Дата правядзення
Час правядзення
Месца правядзення
У пачатку 2019 г. Нацыянальная бібліятэка Беларусі заключыла пагадненне з грамадскім дзеячам і калекцыянерам Уладзімірам Ліхадзедавым аб стварэнні “Фонду Уладзіміра Ліхадзедава” з мэтай выяўлення, вяртання і захавання дакументальнай спадчыны Беларусі.
Уладзімір Аляксеевіч Ліхадзедаў – лаўрэат прэміі Прэзідэнта Рэспублікі Беларусь “За духоўнае адраджэнне” (2006), заснавальнік гісторыка-асветніцкага праекта “У пошуках страчанага”, аўтар дваццаці кніг-альбомаў на васьмі мовах свету, уласнік буйной калекцыі рэдкіх выданняў (каля 100 тыс. адзінак захоўвання). Згодна з пагадненнем аб супрацоўніцтве прадугледжваецца паступовая перадача яго прыватнай калекцыі дакументальных помнікаў ў зборы Нацыянальнай бібліятэкі Беларусі.
На выставе прадстаўлены найбольш каштоўныя аб’екты з першых паступленняў – унікальныя рукапісныя дакументы, мапы, старадрукаваныя і рэдкія кнігі, перыядычныя выданні.
Экспануюцца граматы XVI–XVІI ст., сярод якіх прывілей караля Рэчы Паспалітай Жыгімонта ІІІ Вазы Мінскаму ўніяцкаму манастыру (1617); унікальныя рукапісныя рэгістрацыйныя кнігі культавых устаноў XVІІI–ХІХст. (метрыкі, кнігі перадшлюбных экзаменаў і інш.); унікальны рукапіс беларускіх татар (кітаб); старадрукі XVІІI ст. На выставе дэманструюцца экзэмпляры “Гродненских губернских ведомостей” за 1841 г. – адной з першых беларускіх газет ХІХ ст.
Цікавасць выкліча і ўнікальнае ўзнаўленне “Кнігі Быцця” друку Францыска Скарыны, якое было зроблена творчай групай Уладзіміра Ліхадзедава па тэхналогіі XVI ст. у 2014 г.
Выстаўка працуе з 20 чэрвеня па 20 верасня ў чытальнай зале рукапісаў, старадрукаваных і рэдкіх выданняў (пам. 348).
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Матэрыял прадстаўлены навукова-даследчым аддзелам кнігазнаўства.
