Дата правядзення
Час правядзення
Месца правядзення
3 мая ў бібліятэцы ладзіцца адкрыццё праекта “Насустрач перамозе”, прымеркаванага да 75-годдзя вызвалення Беларусі ад нямецка-фашысцкіх захопнікаў.
Напярэдадні значнай юбілейнай даты праект арганізоўвае Нацыянальная бібліятэка Беларусі (НББ) сумесна з Нацыянальным архівам Рэспублікі Беларусь (НАРБ).
Наведвальнікаў чакаюць кніжная і мастацкая экспазіцыі, якія адлюстроўваюць подзвіг і ахвяру беларускіх партызан і мясцовых жыхароў на шляху да мірнага жыцця.
У кніжную экспазіцыю “Лясная песня” ўвайшлі навукова-папулярныя і літаратурна-мастацкія выданні, выяўленчыя матэрыялы і дзённікі брыгад з фондаў НАРБ і НББ. На выстаўцы прадстаўлены навуковыя артыкулы беларускіх і расійскіх гісторыкаў пра партызанскі рух на тэрыторыі Беларусі ў гады Вялікай Айчыннай вайны, а таксама ўспаміны і артыкулы ветэранаў партызанскага руху і вядомых дзяржаўных дзеячаў БССР. Вялікая ўвага надаецца раскрыццю ролі вызваленчага руху беларускага народа ў перамозе над фашызмам, захаванню памяці аб паўсядзённым жыцці і баявых буднях партызан Беларусі.
Уменне бачыць, жаданне жыць – вось дзякуючы чаму беларусы вытрымалі ўсе нягоды жудаснай вайны. Мастацкая экспазіцыя “Насустрач перамозе” носіць назву агульнага праекта і арганізавана ў адпаведнасці з ім.
Наведвальнікаў чакаюць баявыя лісткі, карты баявых дзеянняў, планы мясцовасцей, замалёўкі ў розных тэхніках (графічныя, акварэльныя), ілюстрацыі да запісаў з дзённікаў брыгад – па-мастацку апрацаваныя матэрыялы з фондаў НАРБ, якія ілюструюць не толькі памкненні і мары, але і здольнасці ўдзельнікаў вайны – партызан і мірных жыхароў. Нават у суровыя, цяжкія часы яны знаходзілі месца ў сваім жыцці для творчасці і імкнуліся да прыгожага – у слове, вобразе, выяве.
Азнаёміцца з выстаўкай можна да 8 верасня 2019 г. у галерэі “Атрыум” (3-ці паверх).
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефоны для даведак: (8 017) 293 29 80, 293 28 81.
E-mail: pr@nlb.by
Матэрыял прадастаўлены аддзелам сувязей з грамадскасцю.
Чытайце таксама пра адкрыццё праекта “Насустрач перамозе”.