Дата правядзення
Час правядзення
Месца правядзення
З 14 лютага па 9 сакавіка ў зале дакументаў па мастацтве (пам. 306) праходзіць кніжна-ілюстрацыйная выстаўка “Каханне – крыніца натхнення”, прымеркаваная да Дня ўсіх закаханых.
Што такое каханне? На працягу многіх стагоддзяў пісьменнікі і паэты, кампазітары і мастакі спрабавалі знайсці адказ на гэтае пытанне. Каханне натхняла, яго апявалі, імкнуліся перадаць мастацкімі сродкамі, адлюстраваць яго сутнасць, захаваць гэта няўлоўнае, шматграннае і высокае пачуццё. Аднак кожная эпоха мела свае ўяўленні аб тым, як павінна адлюстроўвацца тэма кахання ў мастацтве.
У свецкіх творах Рэнесансу каханне асацыюецца з Купідонам і Венерай. У рэлігійным мастацтве хрысціянскі ідэал кахання ўвасабляецца фігурай міласэрнасці. Літаратура рыцарства прынесла росквіт тэм куртуазнага кахання. Гуллівае стаўленне да сэнсу любоўных паняццяў ляжыць у аснове мастацкай вобразнасці ў Францыі XVIII стагоддзя, якое ўвайшло ў гісторыю пад назвай “галантнае”, у той час як у эпоху класіцызму пачуцці зусім адсоўваюцца на другі план, саступаючы месца абавязку. З прыходам эпохі рамантызму паняцце кахання набывае глыбокі сэнс, калі перадача пачуццяў і перажыванняў героя, адлюстраванне яго ўнутранага свету становіцца найбольш важным у творах мастацтва. XX стагоддзе ж прынесла новыя тэндэнцыі, напрамкі і формы, якія аказалі ўплыў на адлюстраванне рэчаіснасці, у якіх каханне паказана ў адпаведнасці з наватарскімі мастацкімі прыёмамі і тэхнікамі. Сёння тэма кахання па-ранейшаму застаецца адной з самых актуальных у мастацтве.
Выстаўка пазнаёміць наведвальнікаў са шматлікімі рэпрадукцыямі работ выдатных мастакоў і скульптараў, якія звярталіся да тэмы кахання: Веранезэ, Рубенса, Рэмбрандта, Вато, Бушэ, Фраганара, Давіда, Радэна, Клімта, Пікасо, Магрыта, Шагала і інш.
Таксама экспануюцца матэрыялы, якія паказваюць вядомых закаханых: Венеру і Аданіса, Амура і Псіхею, Геркулеса і Амфалу, Апалона і Дафну, Парыса і Алену, Трыстана і Ізольду, Рамэа і Джульету і іншых.
Цікавасць наведвальнікаў выкліча літаратура пра мастакоў і іх муз, гісторыі кахання знакамітых жывапісцаў і скульптараў. Сярод іх – Агюст Радэн і Каміла Кладэль, Амедэа Мадыльяні і Жанна Эбютэрн, Пабла Пікасо і Дора Маар, Дыега Рывера і Фрыда Кало, Сальвадор Далі і Гала (Алена Дзьяканава), Марк Шагал і Бэла Разенфельд.
Усяго на выстаўцы прадстаўлена больш за 80 дакументаў.
Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра.
Матэрыял прадастаўлены аддзелам абслугоўвання спецыялізаванымі фондамі.