Дата правядзення
Час правядзення
Месца правядзення
З 17 студзеня па 13 лютага ў зале дакументаў міжнародных арганізацый (пам. 207g) адкрыта тэматычная выстаўка “Стварэнне і развіццё сямейных фермерскіх гаспадарак”, прысвечаная Дзесяцігоддзю сямейных фермерскіх гаспадарак.
Дзесяць гадоў – з 2019 па 2028 год – афіцыйна абвешчаны Дзесяцігоддзем сямейных фермерскіх гаспадарак Арганізацыі Аб’яднаных Нацый на 72-й сесіі Генеральнай асамблеі ААН 20 снежня 2017 года (рэзалюцыя A/RES/72/239).
Адзначыўшы паспяховае правядзенне ў 2014 годзе Міжнароднага года сямейных фермерскіх гаспадарак, за час якога многія краіны дамагліся значнага прагрэсу ў распрацоўцы дзяржаўнай палітыкі ў падтрымку фермерства, Генеральная асамблея адзначыла, што правядзенне Дзесяцігоддзя сямейных фермерскіх гаспадарак будзе спрыяць далейшаму шырокаму абмеркаванню і вырашэнню праблем, якія стаяць перад малымі фермерскімі гаспадаркамі.
Асамблея таксама падкрэсліла ключавую ролю ўрадаў у аказанні падтрымкі сямейным фермерскім гаспадаркам, каб яны змаглі рэалізаваць свой патэнцыял. Гэтая падтрымка павінна ўключаць тэхнічную дапамогу і распрацоўку стратэгій, накіраваных на рост прадукцыйнасці сямейных ферм, забеспячэнне доступу да неабходных тэхналогій, зямельных і водных рэсурсаў, крэдытаў і рынкаў, а таксама паляпшэнне інвестыцыйнага клімату.
Абраўшы такую тэму для Дзесяцігоддзя, асамблея прызнала, што сямейныя фермерскія гаспадаркі спрыяюць устойліваму развіццю і з’яўляюцца галоўнымі дзеючымі асобамі ў вырашэнні двайной праблемы, перад якой сёння стаіць свет, – умацаванне харчовай бяспекі і захаванне прыродных рэсурсаў.
Сямейная фермерская гаспадарка – гэта спосаб арганізацыі сельскагаспадарчай, лясной, рыбнай, пашавай вытворчасці, які ажыццяўляецца і кіруецца сям’ёй і абапіраецца пераважна на працу членаў сям’і, як жанчын, так і мужчын.
У развітых краінах і краінах, якія развіваюцца, колькасць сямейных ферм дасягае больш за 500 мільёнаў – гэта асноўная форма вядзення сельскай гаспадаркі ў сектары вытворчасці харчовых прадуктаў. Прыкладна 80 % сельгаспрадпрыемстваў у Еўрапейскім саюзе – сямейныя фермы, у руках якіх засяроджана 68 % сельгасзямель. У многіх краінах, якія развіваюцца, на сямейныя фермерскія гаспадаркі прыходзіцца да 80 % вытворчасці сярод усіх формаў фермерскіх гаспадарак.
У Беларусі фермерства пакуль не стала асновай аграрнай вытворчасці, а выступае толькі дадаткам да буйной таварнай вытворчасці.
Фермерскія гаспадаркі Рэспублікі Беларусь уносяць пасільны ўклад у стварэнне і рэалізацыю сельскагаспадарчай прадукцыі краіны. Дзякуючы ім вырашаюцца некаторыя сацыяльныя праблемы забеспячэння сельскага насельніцтва працоўнымі месцамі, своечасовай выплаты заработнай платы, аднаўлення зямель, якія раней не выкарыстоўваліся..
Дзяржаўная праграма развіцця аграрнага бізнесу ў Рэспубліцы Беларусь на 2016–2020 гады прадугледжвае меры, накіраваныя на далейшае развіццё фермерскіх гаспадарак.
На 1 студзеня 2018 года ў рэспубліцы зарэгістравана 3 168 сялянскіх (фермерскіх) гаспадарак. За фермерскімі гаспадаркамі замацавана 206,7 тыс. га зямель, на адну фермерскую гаспадарку прыходзіцца ў сярэднім каля 78 га зямлі. Асноўны напрамак вытворчай дзейнасці фермерскіх гаспадарак – раслінаводства, на долю якога прыпадае каля 90 % ад усёй вырабленай імі прадукцыі.
На выстаўцы прадстаўлена больш за 60 дакументаў на рускай і англійскай мовах: кнігі, перыядычныя выданні, брашуры, буклеты.
Экспазіцыя ўключае наступныя тэматычныя раздзелы:
- Арганізацыя і эканамічныя асновы фермерскіх гаспадарак. Роля фермерскіх і асабістых падсобных гаспадарак у развіцці сельскай гаспадаркі краіны
- Развіццё фермерскіх гаспадарак: замежны вопыт
- Фермерская жывёлагадоўля
- Фермерскія гаспадаркі раслінаводчага напрамку
- Фермерскія гаспадаркі Беларусі: стан і тэндэнцыі развіцця
Выстаўка будзе цікавая фермерам, спецыялістам у галіне сельскай гаспадаркі, эканомікі прыродакарыстання, аховы навакольнага асяроддзя, вучоным, студэнтам, аспірантам і ўсім, хто цікавіцца праблемамі развіцця фермерскіх гаспадарак.
Карысныя спасылкі
- Дзесяцігоддзе сямейных фермерскіх гаспадарак (A/RES/72/239)
- Міжнародны год сямейных фермерскіх гаспадарак
- Ацэнка Міжнароднага года сямейных фермерскіх гаспадарак
- Сусветная фермерская арганізацыя (СФА)
- Міжнародны кааператыўны альянс (МКА)
- Харчовая і сельскагаспадарчая арганізацыя Арганізацыі Аб’яднаных Нацый
- Беларускае грамадскае аб’яднанне фермераў
- Міністэрства сельскай гаспадаркі і харчавання Рэспублікі Беларусь
- Развіццё і падтрымка сялянскіх (фермерскіх) гаспадарак у Рэспубліцы Беларусь
- Справаздача аб выніках рэалізацыі Дзяржаўнай праграмы развіцця аграрнага бізнесу ў Рэспубліцы Беларусь на 2016–2020 гады за 2017 год
- Грамадскія аб’яднанні, асацыяцыі сялянскіх (фермерскіх) гаспадарак
Час работы выстаўкі адпавядае рэжыму работы бібліятэкі.
Тэлефон для даведак: (8 017) 293 27 34.
Матэрыял прадастаўлены аддзелам абслугоўвання афіцыйнымі дакументамі.