Дата правядзення
Час правядзення
Месца правядзення
C 4 студзеня па 12 сакавіка ў зале нотных і аўдыявізуальных дакументаў (пам. 305) праходзіць юбілейная выстаўка “Яго песні ў сэрцах, у памяці”, прысвечаная 100-годдзю з дня нараджэння беларускага кампазітара і педагога, народнага артыста Беларусі Уладзіміра Уладзіміравіча Алоўнікава.
Уладзімір Алоўнікаў (1919–1996) адносіцца да плеяды кампазітараў, якія вызначалі мастацкае аблічча беларускай песні ў пасляваенны перыяд. Творчасці кампазітара ўласціва змястоўнасць, актуальнасць тэм. Яго музыка, шчырая і душэўная, стрыманая і строгая, мужная і праўдзівая, атрымала водгук у слухачоў, увайшла ў рэпертуар прафесійных і самадзейных калектываў.
Працаваў кампазітар у жанрах сімфанічнай, камерна-інструментальнай і вакальнай музыкі. Шырокую вядомасць У. Алоўнікаву прынеслі песні (“Песня пра Брэсцкую крэпасць”, “Песня аб Мінску”, “Лясная песня”). Пачатковы матыў адной з іх – “Радзіма, мая дарагая” – стаў пазыўнымі Беларускага радыё. Сярод твораў іншых жанраў вызначаюцца эскіз “Куранты Брэсцкай крэпасці”, сюіта “Песні міру”, “Урачыстая прэлюдыя”, араторыя “Партызанскія песні”, хоры, рамансы, музыка для дзяцей, музыка да спектакляў і кінафільмаў, у ліку якіх “Міколка-паравоз”, “Дзяўчынка шукае бацьку”, “Балада пра маці”. Яснасць мастацкай задумы, дбайны адбор музычных сродкаў, увага да дэталяў, добрае адчуванне формы – вось асноўныя рысы творчасці Уладзіміра Алоўнікава.
Усяго выстаўка налічвае больш за 80 дакументаў. Сярод прадстаўленай літаратуры – зборнікі песень “Вечной славы огонь”, “Памяць сэрца”, “Споём друзья, споём”, зборнік п’ес “Беларускія ўзоры” для аркестра беларускіх народных інструментаў, п’есы для духавога аркестра і аркестра баянаў, песня-марш “Мой Мінск”, сімфанічныя паэмы “Нарач” (фрагмент) і “Партызанская быль”, кантата памяці Марата Казея і інш. Студэнтаў кампазітарскіх аддзяленняў музычных вышэйшых навучальных устаноў зацікавіць вучэбны дапаможнік У.У. Алоўнікава “Правила и техника сочинения контрапункта строгого письма”.
Дапаўняюць экспазіцыю аўдыядакументы, якія даюць магчымасць праслухаць творы Уладзіміра Алоўнікава, а таксама кнігі і артыкулы з перыядычных выданняў аб жыцці і творчасці кампазітара.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.
