Дата правядзення
Час правядзення
Месца правядзення
30 кастрычніка ў бібліятэцы ладзіцца адкрыццё рэтраспектыўнай выстаўкі кніжнай графікі Паўла Татарнікава “Pencil & пэндзаль”.
На рэтраспектыўнай выстаўцы сусветна вядомага кніжнага ілюстратара Паўла Татарнікава “Pencil & пэндзаль” будуць прадстаўлены больш за 90 графічных работ – ілюстрацый да папулярных у Беларусі і за мяжой выданняў.
У скарбонцы мастака – вобразы гістарычнай Беларусі Анатоля Бутэвіча, Уладзіміра Арлова і Уладзіміра Ягоўдзіка; ілюстрацыі да англійскай і французскай класікі (Уiльяма Шэкспіра і Аляксандра Дзюма); шатландскай прозы (Роберта Льюіса Стывенсана); кітайскага эпасу “Нябесны iмператар i 10 сонцаў”; беларускіх народных казак і сусветна вядомых казак Ганса Хрысціяна Андэрсена; ілюстрацыі да выдання паводле лiбрэта аднайменнай оперы Рыхарда Вагнера “Золата Рэйна” і шмат іншых работ.
Графіка мастака вылучаецца вытанчанасцю, выверанасцю і дакладнасцю элементаў. Кожная дэталь напоўнена глыбокім філасофскім зместам. Можна сказаць, што кожны яго твор – гэта раман, прасякнуты шчырай павагай да прадмета выяўлення.
Павел Юр'евіч Татарнікаў – беларускі мастак-графік, кніжны ілюстратар, дацэнт кафедры графікі Беларускай дзяржаўнай акадэміі мастацтваў, член Беларускага саюза мастакоў, акадэмік Беларускай акадэміі выяўленчага мастацтва, удзельнік мноства выставак у розных краінах свету, дыпламант і лаўрэат шматлікіх конкурсаў, вядучы мастак у галіне ілюстравання беларускіх казак і гістарычных выданняў.
“Pencil & пэндзаль” – рэтраспектыўная выстаўка графікі мастака, які больш за два дзесяцігоддзі ўпрыгожвае і робіць прывабнымі дзясяткі кніг розных аўтараў і рознага зместу для аўдыторыі самага рознага ўзросту.
Вернісаж можна пабачыць у галерэі “Лабірынт” (3-ці паверх).
Запрашаем наведаць выстаўку да 24 лютага 2019 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра бібліятэкі.
Тэлефоны для даведак: (8 017) 266 37 37, 293 28 81.
Е-mail: pr@nlb.by
Чытайце таксама, як прайшло адкрыццё рэтраспектыўнай выстаўкі кніжнай графікі Паўла Татарнікава “Pencil & пэндзаль”.
