Дата правядзення
Час правядзення
Месца правядзення
14 чэрвеня ў бібліятэцы адкрыецца выстаўка “Адзенне нашых продкаў. Графіка XVIII–XIX стагоддзяў”.
Выстаўка ўключае калекцыю гравюр XVIII і літаграфій XIX стагоддзя рускіх і замежных мастакоў з фондаў Расійскай дзяржаўнай бібліятэкі мастацтваў. Прадстаўленыя выявы знаёмяць з нацыянальным касцюмам народаў, якія засялялі Расію ў мінулыя стагоддзі (рэгіёны Паўночнага Каўказа і Паволжа, Крайняй Поўначы, Сібіры, Сярэдняй Азіі, Прыбалтыкі і інш.).
У экспазіцыю ўвайшлі гравюры І.Г. Георгі (1729–1802), літаграфіі Е.М. Карнеева (1782–1839) і хромалітаграфіі з альбома “Народы России” Г.Ф. Паўлі (1817–1867). На адных літаграфіях персанажы статычныя, на іншых паказаны за якім-небудзь заняткам. Усе фігуры намаляваны на фоне пейзажу, фасада або інтэр’еру жылля – у залежнасці ад таго, што мастаку ўяўлялася найбольш тыповым для дадзенай мясцовасці.
Выявы імкнуцца да маляўнічасці, яркіх і насычаных колераў. Драбнюткія дэталі, арнаменты тканін і ўпрыгажэнні прапрацаваны з ювелірнай дакладнасцю, а выразныя твары адпавядаюць этнічным тыпам. Частка малюнкаў зроблена з натуры, іншая – па матэрыялах калекцый, якія належалі Імператарскаму рускаму геаграфічнаму таварыству.
У дзень адкрыцця экспазіцыі Нацыянальная бібліятэка Беларусі прадставіць увазе наведвальнікаў выстаўку-прагляд энцыклапедычных выданняў, кніг і артыкулаў з перыёдыкі па гісторыі рускага і беларускага касцюма.
Вернісаж пачнецца а 16-й гадзіне ў галерэі “Ракурс” (2-гі паверх).
Запрашаем наведаць выстаўку “Адзенне нашых продкаў. Графіка XVIII–XIX стагоддзяў” да 1 верасня 2018 года.
Дата завяршэння работы выстаўкі можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра бібліятэкі.
Тэлефоны для даведак: (8 017) 293 28 81, 266 37 37, 293 28 23.
Е-mail: pr@nlb.by
Чытайце таксама аб адкрыцці выстаўкі.
