Месца правядзення
З 30 мая па 30 жніўня на 2-м паверсе кальцавога калідора бібліятэкі працуе выстаўка “Лета з добрай кнігай”, прымеркаваная да Міжнароднага дня абароны дзяцей (1 чэрвеня) і пачатку летніх канікул.
Лета – час вялікіх канікул, цікавых назіранняў, вясёлых сустрэч і карыснага адпачынку. Усім бацькам хочацца, каб іх дзеці імкнуліся да ведаў, дасягнулі поспехаў у жыцці. Адным з найлепшых сродкаў інтэлектуальнага ўдасканалення ва ўсе часы з’яўлялася кніга. Чытанне спрыяе фарміраванню больш развітога, сацыяльна цэннага чалавека. Вялікую ролю ў гэтым працэсе адыгрывае сістэматычнае далучэнне дзіцяці да сямейнага чытання, якое арганізуецца з дапамогай дамашніх бібліятэк. Дзякуючы ім у сям’і ёсць магчымасць выхоўваць любоў да кнігі.
На тэматычнай кніжнай выстаўцы “Лета з добрай кнігай” экспануецца каля 150 выданняў для дзяцей і пра дзяцей.
Выданні аднаго з раздзелаў – “Першыя крокі на шляху да кнігі” – змяшчаюць простыя і займальныя практыкаванні па навучанні чытанню і стануць знаходкай для бацькоў, якія жадаюць навучыць дзіця любіць кнігу і выпрацаваць навык хуткага чытання.
У раздзел “На далонях вечнасці” ўвайшлі кнігі, прысвечаныя гісторыі і славутым асобам Беларусі. На старонках гэтых выданняў цікава апавядаецца пра найбольш яркія і значныя падзеі, з’явы, помнікі культуры і гісторыі, па якіх пазнаюць і прызнаюць беларусаў, адрозніваюць нашу краіну ад іншых.
Раздзел “У пошуках прыгод і таямніц” больш арыентаваны на падлеткаў і запрашае ў захапляльныя і фантастычныя вандроўкі па розных гістарычных часах і прасторах, а таксама па трывожным і зваблівым свеце пачуццяў і складаных лабірынтах чалавечых адносін.
Выстаўка зацікавіць дзіцячую аўдыторыю, а таксама будзе карыснай для дарослых.
Час работы выстаўкі адпавядае рэжыму работы бібліятэкі. Уваход – па чытацкім білеце або білеце сацыякультурнага цэнтра бібліятэкі.
Тэлефон для даведак: (8 017) 293 29 80.