З 12 студзеня па 12 лютага ў зале дакументаў па мастацтве (пам. 306) праходзіць кніжна-ілюстрацыйная выстаўка “Маўклівы выклік вечнасці”, прысвечаная 110-годдзю з дня нараджэння выдатнага беларускага скульптара Заіра Ісаакавіча Азгура.
Уменне перадаць эпоху ў скульптуры, прадставіць гісторыю сваёй краіны з дапамогай твораў мастацтва, маштабна і суцэльна захаваць вобраз свайго народа, пакідаючы след у памяці, – адна з самых складаных задач для сапраўднага мастака. Усё гэта здолеў увасобіць у сваёй творчасці Заір Азгур (1908–1995), адзін з заснавальнікаў традыцый беларускай скульптурнай школы. Яго стыль, які вылучае яго сярод мноства іншых аўтараў, адрозніваецца экспрэсіяй, жывасцю і дынамічнасцю формы, эмацыянальнасцю і выразнасцю пластычнага рашэння.
У творчасці майстра галоўнае месца займаюць скульптурныя партрэты, у якіх дакладна перададзены ўзрост і характар героя, яго настрой, лёс. На выстаўцы прадстаўлены шматлікія рэпрадукцыі твораў Заіра Ісаакавіча. Наведвальнікі ўбачаць вобразы дзяржаўных дзеячаў, прадстаўнікоў беларускай культуры і мастацтва, навукі, гістарычных асоб, такіх як Ф. Скарына, К. Каліноўскі, Усяслаў Чарадзей, П. Машэраў, Я. Купала, Я. Колас, К. Крапіва, Цётка, Ул. Галубок, Ул. Дзядзюшка, Л. Александроўская, М. Аладаў, Я. Цікоцкі і многія іншыя.
Заір Азгур выканаў цыкл работ, якія паказваюць удзельнікаў Вялікай Айчыннай вайны, іх стойкасць, мужнасць і высакародную прастату. Прыцягнуць увагу наведвальнікаў выстаўкі скульптурныя партрэты М. Гастэлы, В. Харужай, Дзеда Талаша, Бацькі Міная (М. Шмырова).
Цікавасць выклічуць выяўленчыя матэрыялы з калекцыі Мемарыяльнага музея-майстэрні З.І. Азгура, якія прадстаўляюць даваенныя працы скульптара – найменш вядомую старонку яго творчасці.
Дапаўняюць экспазіцыю мемуары і артыкулы самога Заіра Ісаакавіча. Сярод іх – “Незабыўнае”, “То, что помнится...”, дзе ён ярка і вобразна прадставіў сваю эпоху, перажытыя гістарычныя падзеі, сваіх сучаснікаў, уласныя думкі пра мастацтва і майстэрства скульптара.
Усяго на выстаўцы прадстаўлена больш за 50 дакументаў, у тым ліку альбомы рэпрадукцыі, кнігі, каталогі выставак, паштоўкі і артыкулы.
Тэлефон для даведак: (8 017) 293 27 53.
