З 3 сакавіка па 27 красавіка ў зале перыядычных выданняў (пам. 106) праходзіць тэматычная выстаўка “З любоўю да Жанчыны…”.
Дзень жанчын… Гэта першае веснавое свята прыносіць у жыццё і прымнажае светлыя пачуцці павагі, удзячнасці і любові да чароўнай паловы чалавецтва.
На працягу многіх стагоддзяў жанчыны ва ўсім свеце кіравалі дзяржавамі, змагаліся за правы сваіх народаў, рабілі навуковыя адкрыцці, натхнялі на подзвігі і станавіліся першаадкрывальнікамі. Імёны некаторых шырока вядомыя, пра іншых мы мала чулі, але гэта не робіць іх дасягненні менш каштоўнымі. Звярнуць увагу на ролю жанчыны ў гісторыі чытачам даюць магчымасць часопісы “Беларуская думка”, “Дело”, “Планета”. Роля хатняй гаспадыні перастала быць манаполіяй жанчын, роўна як і інтэлектуальная дзейнасць – манаполіяй мужчын. Мы ўсё часцей назіраем жанчын у палітыцы, бізнэсе, навуцы. Пра такіх шматгранных асоб распавядаюць артыкулы ў часопісах «Алеся», «Женский журнал».
Экспазіцыя знаёміць з перыядычнымі выданнямі “Женское здоровье”, “Кудесница”, “Здоровье и успех”, “Секреты исцеления”, “Здоровье”, з якіх можна даведацца, як заставацца заўсёды маладой, здаровай і прыгожай, аб сакрэтах даўгалецця і бездакорнай знешнасці.
Незалежна ад поля дзейнасці кожная жанчына мае свае захапленні, любімыя заняткі. Публікацыі ў часопісах “Поделись советом”, “Домашний”, “Наша кухня”, “Золотые ручки” і многіх іншых раскажуць пра тое, як зрабіць больш разнастайным свой вольны час.
Усяго на выстаўцы прадстаўлена каля 40 перыядычных выданняў.
Тэлефон для даведак: (8 017) 293 25 87.
