7 сакавіка ў бібліятэцы прайшоў канцэрт “Беражыце[ся] жанчын!”, прысвечаны самаму галоўнаму вясноваму святу – Дню жанчын.
Кажуць, жанчына на караблі – да бяды. Катэгарычна не згодныя! Жанчына і на караблі, і ў доме, і на працы – да сытага страўніка, утульнасці, прыгажосці і нястрымнай весялосці. Ва ўсім гэтым сёння змаглі пераканацца супрацоўнікі бібліятэкі падчас святочнага “марскога падарожжа”.
Цёплыя віншаванні і выдатныя вершы падарыў мілым дамам капітан карабля – дырэктар Нацыянальнай бібліятэкі Беларусі Раман Матульскі. Гэтыя паэтычныя радкі сталі віншаваннем не толькі для чароўных супрацоўніц бібліятэкі, але і для ўсіх жанчын нашай краіны – сёння раніцай у выкананні Рамана Сцяпанавіча яны прагучалі ў праграме СТV “Раніца. Студыя добрага настрою”.
Якар паднялі, ветразі расправілі, і вось карабель выносіць гледачоў у мора творчасці, добрага настрою і папулярных хітоў 80-х, а на палубе разгортваецца яркая вясновая шоу-праграма.
Творчыя віншаванні на імпрэзе прагучалі ад танцавальнага папуры “Good show”, гурта “Правакацыя” і артыста Нацыянальнага акадэмічнага Вялікага тэатра оперы і балета Рэспублікі Беларусь Ільі Сільчукова.
Вядомыя хіты “Летящей походкой” і “Мечты сбываются”, здольныя зачараваць сэрца кожнай жанчыны, выканалі таленты бібліятэкі – Васіль Прус, Наталля Жывалкоўская і Леанід Крыўцоў.
Пра тое, што можа адбыцца, калі вы раптам задумаеце адправіцца ў адпачынак без жонкі, распавялі і паказалі харызматычныя артысты Наталля Башкірава і Віктар Літошык падчас гумарыстычнай мініяцюры. Увогуле, ідэя такога падарожжа – правальная!
Мілыя, пяшчотныя, цудоўныя жанчыны – супрацоўніцы Нацыянальнай бібліятэкі Беларусі! Будзьце заўсёды здаровыя, шчаслівыя, прыгожыя і гатовыя да самых нечаканых падарожжаў! Цяпла вам, лёгкага брызу і надзейнага спадарожніка! З Днём 8 Сакавіка!
