12 красавіка ў Віцебскім дзяржаўным універсітэце імя П.М. Машэрава прайшоў семінар па выкарыстанні рэсурсаў і сэрвісаў віртуальнай чытальнай залы Нацыянальнай бібліятэкі Беларусі (ВЧЗ НББ) для інфармацыйнага забеспячэння навукова-адукацыйных працэсаў ВНУ.
Семінар быў арганізаваны Саветам бібліятэк Беларусі па інфармацыйным узаемадзеянні, Нацыянальнай бібліятэкай Беларусі, кампаніяй EBSCO Information Services, Віцебскім дзяржаўным універсітэтам імя П.М. Машэрава (ВДУ імя П.М. Машэрава).
У сваім прывітанні прарэктар па вучэбнай рабоце ВДУ імя П.М. Машэрава Веслаў Туркоўскі падкрэсліў важнасць павышэння эфектыўнасці інфармацыйнага забеспячэння навукова-адукацыйных працэсаў у ВНУ.
Вялікую цікавасць выклікала выступленне загадчыка сектара інфармацыйнага забеспячэння інавацыйнай дзейнасці Нацыянальнай бібліятэкі Беларусі Вячаслава Брычкоўскага. У сваім дакладзе ён коратка праінфармаваў удзельнікаў семінара аб электронных інфармацыйных рэсурсах ВЧЗ НББ, падрабязна распавёў пра асноўныя перавагі арганізацыі аддаленага доступу партнёраў ВЧЗ НББ да аўтарытэтных баз даных вядучых сусветных выдавецтваў і агрэгатараў. Ён таксама анансаваў стварэнне на платформе “Бітрыкс” тэматычнага сайта “Беларусь у інфармацыйнай прасторы” ў рамках ВЧЗ НББ.
З асноўнымі калекцыямі электронных рэсурсаў, даступных на платформе EBSCOhost, удзельнікаў семінара пазнаёміў Андрэй Сакалоў, дырэктар па рэгіянальным развіцці ў Расіі, Беларусі і Малдове кампаніі EBSCO Information Services. У сваім дакладзе ён падрабязна распавёў пра рэсурсы БД Academic Search Premier, якая карыстаецца вялікай папулярнасцю ва ўсіх універсітэтах свету.
Пасля выступлення Андрэя Сакалова адбылася дыскусія па пытаннях выкарыстання рэсурсаў EBSCO ў ВНУ. У дыскусіі прынялі актыўны ўдзел загадчыкі кафедры ВДУ імя П.М. Машэрава.
Падчас трэнінгу, праведзенага Тамілай Міркамалавай, спецыялістам па рабоце з кліентамі EBSCO ў Расіі і краінах СНД, былі прадстаўлены асаблівасці пошуку на платформе EBSCOhost, а таксама разгледжаны іншыя пытанні, звязаныя з настройкай інтэрфейсу EBSCOhost для канечных карыстальнікаў.
У рабоце семінара прынялі ўдзел звыш 80 прадстаўнікоў Віцебскага ўніверсітэта, сярод якіх былі загадчыкі кафедраў, выкладчыкі, навуковыя работнікі, аспіранты, магістранты і бібліятэкары.
