22–23 сакавіка дырэктар Нацыянальнай бібліятэкі Беларусі Раман Матульскі ў складзе беларускай дэлегацыі прымае ўдзел у мерапрыемствах праграмы візіту Кіраўніка дзяржавы ў Грузію.
22 сакавіка адбыліся афіцыйныя перагаворы Прэзідэнта Рэспублікі Беларусь Аляксандра Лукашэнка з Прэзідэнтам Рэспублікі Грузія Георгіем Маргвелашвілі ў пашыраным складзе.
Раман Матульскі прыняў удзел у перамовах, а таксама сумесна з генеральным дырэктарам Нацыянальнай парламенцкай бібліятэкі Грузіі Георгіем Кекелідзе падпісаў мемарандум аб супрацоўніцтве.
23 сакавіка ў Нацыянальнай парламенцкай бібліятэцы Грузіі пройдзе мерапрыемства, прысвечанае 500-годдзю беларускага кнігадрукавання. Раман Сцяпанавіч прэзентуе міжнародны навуковы і выдавецкі праект па перавыданні кніжнай спадчыны Францыска Скарыны і перадасць у дар грузінскаму боку шматтомнае факсіміле.
