2 сакавіка на галоўнай сцэне XXV Мінскай міжнароднай кніжнай выстаўкі-кірмашу прайшла ўрачыстая цырымонія ўзнагароджання пераможцаў 57-га Нацыянальнага конкурсу “Мастацтва кнігі”.
На ўзнагароды прэстыжнага конкурсу прэтэндавала каля 150 выданняў, аднак галоўнай прэміяй – Гран-пры ў намінацыі “Трыумф”, Дыпломам імя Францыска Скарыны і “Вялікім залатым фаліянтам” – адзначаны альбом “Сусветная спадчына Францыска Скарыны” выдавецтва “Беларуская Энцыклапедыя імя Петруся Броўкі”.
Альбом серыі “Энцыклапедыя рарытэтаў” выйшаў у рамках святкавання 500-годдзя беларускага кнігадрукавання і падрыхтаваны беларускімі спецыялістамі ў галіне кнігазнаўства і скарыназнаўства – намеснікам дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандрам Сушам і загадчыцай навукова-даследчага аддзела кнігазнаўства Галінай Кірэевай.
Альбом распавядае аб кожнай кнізе беларускага першадрукара і наглядна прадстаўляе кніжную спадчыну Францыска Скарыны, якая ў цяперашні час захоўваецца ў многіх краінах свету – у кніжных і музейных зборах Беларусі, Вялікабрытаніі, Германіі, Даніі, ЗША, Літвы, Польшчы, Расіі, Славеніі, Украіны, Чэхіі.
