2 сакавіка ў рамках ХХV ММКВК на cтэндзе Нацыянальнай бібліятэкі Беларусі прайшлі прэзентацыі “Інфармацыйны рэсурс «Электронны архіў нацыянальнай перыёдыкі»” і “Віртуальны свет каштоўнасцей”.
Быць бліжэй да чытача і адпавядаць патрабаванням сучаснага карыстальніка – задача важная і выканальная. У час інтэрнэт-тэхналогій, калі безупынна расце кантэнт (дарэчы, не заўсёды дакладны!), Нацыянальная бібліятэка Беларусі ўзяла на сябе місію правадніка ў свеце інфармацыі, удасканальваючы змест і формы яе падачы.
Падчас першай прэзентацыі загадчыца сектарам фарміравання і ўліку лакальных электронных інфармацыйных рэсурсаў аддзела фарміравання электроннай бібліятэкі Вольга Лук’янава прадставіла ўвазе слухачоў мадэрнізаваны “Электронны архіў нацыянальнай перыёдыкі”.
Рэсурс уключае поўныя тэксты электронных копій газет, часопісаў і паведамленняў інфармацыйных агенцтваў, якія выходзяць у свет у Рэспубліцы Беларусь. На пачатак 2018 года карыстальнікі бібліятэкі маюць доступ да 507 назваў (больш за 85 000 экзэмпляраў) беларускіх перыядычных выданняў.
Аб такіх сучасных інфармацыйных прадуктах Нацыянальнай бібліятэкі, як мультымедыйныя віртуальныя праекты, распавяла прысутным загадчыца аддзела абслугоўвання спецыялізаванымі фондамі Таццяна Хадасевіч падчас прэзентацыі “Віртуальны свет каштоўнасцей”.
Віртуальныя праекты з’яўляюцца важнай часткай нацыянальнай інфармацыйнай прасторы, так як яны прысвечаны дзеячам культуры і мастацтва Беларусі, кніжным помнікам, а таксама адлюстроўваюць найважнейшыя гістарычныя падзеі нашай краіны. Самыя запатрабаваныя – праект “Класікі сусветнай літаратуры Янка Купала і Якуб Колас”, “Віртуальнае падарожжа з Янкам Маўрам”, віртуальная выстаўка “Залатыя кросны душы”, прысвечаная Янку Брылю.
