З 15 лютага па 14 сакавіка ў зале дакументаў міжнародных арганізацый (пам. 207g) адкрыта тэматычная выстаўка “Сацыяльная справядлівасць і сацыяльнае развіццё”, прысвечаная Сусветнаму дню сацыяльнай справядлівасці.
Гэты Дзень быў абвешчаны на 62-й сесіі Генеральнай асамблеі ААН 26 лістапада 2007 года (рэзалюцыя A/RES/62/10) і штогод адзначаецца 20 лютага пачынаючы з 2009 года.
У сваёй рэзалюцыі асамблея прызнала, што сацыяльнае развіццё і сацыяльная справядлівасць неабходныя для забеспячэння і падтрымання міру і бяспекі ўнутры краін і ў адносінах паміж імі. У сваю чаргу, сацыяльнае развіццё і сацыяльная справядлівасць не могуць быць дасягнуты ў адсутнасці міру і бяспекі або без павагі ўсіх праў чалавека і асноўных свабод.
Асамблея падкрэсліла, што правядзенне Сусветнага дня сацыяльнай справядлівасці павінна спрыяць далейшаму нарошчванню намаганняў міжнароднай супольнасці ў галіне выкаранення галечы, забеспячэння поўнай занятасці, годнай працы, раўнапраўя мужчын і жанчын, сацыяльнага дабрабыту і сацыяльнай справядлівасці для ўсіх.
ААН лічыць імкненне да сацыяльнай справядлівасці адной з сваіх галоўных місій. Арганізацыя падтрымлівае прынцыпы справядлівасці, здымаючы бар'еры, якія ўзнікаюць перад людзьмі з-за іх полу, узросту, расавай, этнічнай ці рэлігійнай прыналежнасці, культуры ці наяўнасці інваліднасці.
У сакавіку 1995 года ў Капенгагене прайшла Сусветная сустрэча на вышэйшым узроўні ў інтарэсах сацыяльнага развіцця, на якой былі абвешчаныя задачы сацыяльнага развіцця сучаснага грамадства. Кіраўнікі 117 дзяржаў і ўрадаў прынялі Капенгагенскую дэкларацыю аб сацыяльным развіцці і Праграму дзеянняў, дзе замацавалі канкрэтныя абавязацельствы па паляпшэнні ўмоў жыцця чалавека.
Праз пяць гадоў, у 2000 годзе, дзяржавы – члены ААН правялі 24-ю спецыяльную сесію Генеральнай асамблеі ў інтарэсах сацыяльнага развіцця. Яны прааналізавалі вынікі ажыццяўлення капенгагенскіх рашэнняў, вызначылі асноўныя перашкоды і шляхі іх ліквідацыі. Галоўны вывад сустрэчы 2000 года заключаўся ў тым, што эканамічны рост дзяржаў павінен быць звязаны з павышэннем якасці жыцця людзей.
10 чэрвеня 2008 года Міжнародная арганізацыя працы аднагалосна прыняла Дэкларацыю МАП аб сацыяльнай справядлівасці ў мэтах справядлівай глабалізацыі. У ёй гаворыцца аб гарантыі дасягнення справядлівых вынікаў для ўсіх шляхам забеспячэння занятасці, сацыяльнай абароны, сацыяльнага дыялогу і асноўных прынцыпаў і праў на працоўным месцы.
Правядзенне кожнага Сусветнага дня сацыяльнай справядлівасці арганізавана вакол тэмы, сфакусіраванай на самай актуальнай сацыяльнай праблеме. Тэма 2018 года – “Работнікі ў пошуку сацыяльнай справядлівасці”.
Прапанаваная чытачам выстаўка налічвае каля 70 дакументаў. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя ўключае наступныя тэматычныя раздзелы:
- Міжнароднае, рэгіянальнае і міжрэгіянальнае супрацоўніцтва ў інтарэсах сацыяльнага развіцця і справядлівасці
- Выкараненне галечы
- Забеспячэнне поўнай занятасці і годнай працы
- Абарона і падтрымка праў чалавека і гендарнай роўнасці
- Усеагульны доступ да адукацыі і якасных паслуг аховы здароўя
- Аказанне дапамогі эканамічнаму, сацыяльнаму і культурнаму развіццю найменш развітых краін і краін з пераходнай эканомікай
Выстаўка будзе цікавая студэнтам, магістрантам, выкладчыкам сацыяльна-эканамічных дысцыплін, палітычным і грамадскім дзеячам, спецыялістам у галіне міжнароднага права, сусветнай палітыкі, міжнародных адносін і праў чалавека, работнікам сацыяльнай сферы.
Карысныя спасылкі
- Мэты развіцця тысячагоддзя
- Сацыяльнае развіццё
- Аддзел сацыяльнай палітыкі і развіцця *
- Камісія сацыяльнага развіцця
- Эканамічны і сацыяльны савет (ЭКАСАС)
- Спецыяльная сесія Генеральнай асамблеі (2000 год)
- Сусветная сустрэча на вышэйшым узроўні ў інтарэсах сацыяльнага развіцця (1995 год)
- Барацьба супраць галечы
- Галеча і ўстойлівае развіццё
- Другое дзесяцігоддзе ААН па барацьбе за ліквідацыю галечы (2008–2017 гады)
- Міжнародны дзень барацьбы за ліквідацыю галечы (17 кастрычніка)
- Сусветны дзень сацыяльнай справядлівасці
Дакументы
- Рэзалюцыі Генеральнай асамблеі
- Рэзалюцыі ЭКАСАС
- Даклад аб сусветным сацыяльным становішчы
- Агляд сусветнага эканамічнага і сацыяльнага становішча
- Капенгагенская дэкларацыя і Праграма дзеянняў, прынятыя на Сусветнай сустрэчы на вышэйшым узроўні ў інтарэсах сацыяльнага развіцця
- Дэкларацыя МАП аб асноватворчых прынцыпах і правах у сферы працы і механізм яе рэалізацыі
- Сацыяльная справядлівасць у адкрытым свеце: роля Арганізацыі Аб'яднаных Нацый
